అటల్ పెన్షన్ యోజన 

వృద్ధాప్యంలో ఎవరూ కూడా తమ కనీస జీవనావసరాల నిమిత్తం ఇతరులపై ఆధారపడకుండా నెలనెలా పింఛను రూపంలో కొంత మొత్తాన్ని పొంది గౌరవంగా జీవించాలనే ఉద్దేశంతో భారతప్రభుత్వం ప్రవేశపెట్టిన నూతన పథకం అటల్ పెన్షన్ యోజన.

ఈ పథకం జూన్ 1, 2015న ప్రారంభమైనది. ఈ పథకం కింద పాలసీ తీసుకున్నట్లయితే 60 సంవత్సరాల నుండి నెలనెలా రూ.1,000/- ల నుండి రూ.5,000/- ల వరకూ పింఛను పొందవచ్చు.

| అర్హత

• బ్యాంకు పొదుపు ఖాతా కలిగిన ప్రతిఒక్కరూ ఈ పథకంలో చేరవచ్చు.
• 18 సంవత్సరాలనుండి 40 సంవత్సరాల వయసు కలిగిన ప్రతిఒక్కరూ అర్హులే.
• గత ఎన్.పి.ఎస్. లైట్ పథకంలోని పాలసీదారులుకూడా ఈ కొత్తపథకంలో చేరవచ్చు.

| ఖాతాను తెరిచే విధానం

• బ్యాంకు ప్రతినిధిని లేదా బ్యాంకు మిత్రను కలిసి సంబంధిత ఫారంను, రిజిస్ట్రేషను ఫారంను పూర్తి చేయాలి.
• ఫారంలో అడిగిన అన్ని వివరాలూ తప్పనిసరిగా తెలియజేయాలి. (మొబైల్ నంబరు, ఆధార్ నంబరుతో సహా)
• వయసును బట్టి ఎంత 'కిస్తీ' కట్టాలో (కాంట్రిబ్యూషను) బ్యాంకు నిర్ధారిస్తుంది.
• ఇంతకు ముందు బ్యాంకు ఖాతా లేనట్లయితే, ఇప్పుడు బ్యాంకు ఖాతా మరియు అటల్ పింఛన్ యోజన పథకం ప్రారంభించవచ్చు.
•  బ్యాంకు ఖాతా తెరిచేటపుడు 'నీ వినియోగదారుని గురించి తెలుసుకో.' (కె.వై.సి.) నిబంధనలను అనుసరించాలి.
• మీరు డిపాజిట్ చేసిన మొత్తం లేదా మీ పొదుపు ఖాతాలో నుండి మీ ‘కిస్తీ' ని (కాంట్రిబ్యూషను) తీసుకునే అధికారాన్ని బ్యాంకుకు కల్పించాలి.
• ఈ ఖాతాలో కాంట్రిబ్యూషనుకు కావలసిన మొత్తం లేనట్లయితే ఆ తరువాత అపరాధ రుసుముతో కలిపి బ్యాంకు వసూలు చేస్తుంది.
• ఖాతాలో కాంట్రిబ్యూషన్ వసూలు చేయడానికి 24 నెలల సమయం బ్యాంకు మనకు ఇస్తుంది.
• గడువు ముగిసేలోపు మనం కాంట్రిబ్యూషనుకు కావలసిన మొత్తాన్ని డిపాజిట్ చేయలేకపోయినట్లయితే ఖాతాను బ్యాంకు మూసివేస్తుంది.
• ఖాతాదారుడు పాలసీ తీసుకునేటప్పుడు ఫారంలో తప్పనిసరిగా నామినీ పేరును ప్రతిపాదించాలి. పాలసీదారుడు మరణిస్తే పింఛను జీవితభాగస్వామికి ఇస్తారు. ఇద్దరూ లేకపోయినట్లయితే పింఛను నిధిని నామినీకి ఇస్తారు.

| అటల్ పెన్షన్ యోజన ద్వార ఉపయోగాలు

• 60 సంవత్సరాల వయస్సు నుండి మీరు, మీ మరణం తరువాత మీ జీవిత భాగస్వామి
• ప్రతి నెలా నిర్దిష్టమైన పెన్షన్ పొందుతారు. మీ జీవిత భాగస్వామి తరువాత మీ నామినీ రూ.1,70,000/- ల నుండి 8,50,000/- ల వరకు పొందుతారు.
•  కనీస పెన్షన్ ప్రయోజనానికి ప్రభుత్వం గ్యారంటీ ఇస్తుంది.
• నెలవారి చెల్లించవలసిన సొమ్ము లబ్ధిదారుని వయస్సు మరియు ఎంచుకున్న పెన్షన్ సొమ్ముపై ఆధారపడి ఉంటుంది.
• కంట్రిబ్యూషన్ సొమ్ము ఖాతాదారుల పొదుపు ఖాతా నుండి బ్యాంక్ ద్వారా 'ఆటో డెబిట్' సదుపాయం ద్వారా తీసుకోబడుతుంది.
• 31 డిసెంబరు 2015 కి లోపల ఈ పథకంలో చేరితే, మొత్తం సహాయంలో కేంద్ర ప్రభుత్వం 50% లేదా ప్రతి ఏటా రూ. 1,000/- లు, ఏది తక్కువైతే అది. ఈ సహాయం అర్హులైన ఖాతాదారులందరికీ 5 సంవత్సరాల పాటు చెల్లిస్తుంది.
• ఏ వ్యక్తి అయినా కేవలం ఒక పొదుపు ఖాతా ద్వారా మాత్రమే ఈ పథకాన్ని పొందగలరు.